చెన్నైలో కలకలం.. మళ్లీ హడలెత్తించిన ఆకతాయిలు.. సీఎం, నటులకు బాంబు బెదిరింపులు

తమిళనాడులో ప్రముఖులను లక్ష్యంగా చేసుకుని ఆకతాయిలు మరోసారి రెచ్చిపోయారు. సీఎం ఎంకే స్టాలిన్‌తో పాటు ప్రముఖ నటులు అజిత్ కుమార్, అరవింద్ స్వామి, ఖుష్బూ నివాసాల్లో బాంబులు పెట్టినట్లు ఆదివారం రాత్రి ఈ-మెయిల్ ద్వారా బెదిరింపులు వచ్చాయి. ఈ హెచ్చరిక ఈ-మెయిల్ డీజీపీ కార్యాలయానికి కూడా రావడంతో పోలీసులు తక్షణమే అప్రమత్తమయ్యారు.

ఈ-మెయిల్ సమాచారం అందిన వెంటనే, బాంబు నిర్వీర్యక దళాలు రంగంలోకి దిగాయి. సీఎం స్టాలిన్, ముగ్గురు నటుల నివాసాలకు ఏకకాలంలో చేరుకుని క్షుణ్ణంగా తనిఖీలు చేపట్టాయి. గంటలపాటు సాగిన సోదాల్లో ఎక్కడా ఎలాంటి పేలుడు పదార్థాలు లభించకపోవడంతో అదంతా ఉత్తిదేనని తేలింది. దీంతో అధికారులు, కుటుంబ సభ్యులు ఊపిరి పీల్చుకున్నారు.

నటుడు అజిత్ కుమార్‌కు బాంబు బెదిరింపు రావడం వారం రోజుల్లో ఇది రెండోసారి కావడం గమనార్హం. గత వారం కూడా చెన్నైలోని ఇంజంబాక్కంలో ఉన్న ఆయన నివాసానికి గుర్తు తెలియని వ్యక్తి నుంచి బెదిరింపు కాల్ వచ్చింది.

ఇటీవల కాలంలో చెన్నైలో ఇలాంటి బెదిరింపులు ఎక్కువయ్యాయి. కొద్ది రోజుల క్రితం నటుడు అరుణ్ విజయ్ ఇంట్లో, సంగీత దర్శకుడు ఇళయరాజా స్టూడియోలో బాంబులు పెట్టామని ఇలాగే బెదిరింపులు రాగా, అవి కూడా ఆకతాయిల పనేనని తేలింది. వరుస ఘటనలపై పోలీసులు సీరియస్‌గా దృష్టి సారించారు. బెదిరింపు ఈ-మెయిల్స్ పంపిన వారిని గుర్తించేందుకు దర్యాప్తు చేస్తున్నారు.